الاثنين، 6 أبريل، 2009

هجاوب التاج وأمرى لله






التاج ده وصلنى من كل أصدقائى بالكامل


بصراحه كانوا متفقين عليا


ربنا يسامحهم بقى



أمرى لله هضطر انى أجاوب عليه


بعد إلحاح شديد مع النفس


وده لخمس أسباب


السبب الأول


لأنى مقدرش أرفض طلب أصحابى الغاليين


والسبب التانى


عشان أتعود على اجابات التاجات عشان لو جانى تاج تانى


ودول الثلاث أسباب الرئيسيه لإجابة التاج


ونبدأ


بسم الله الرحمن الرحيم



أسمك؟

علاء الدين

المشهور بيه وسط صاحبك؟

الحزين للأسف

سنك؟

23 سنه اييييييييييييييه دنيا ياللا حسن الختام

مجال دراستك؟

كلية الدراسات الاسلاميه قسم أصول الدين (جامعة الأزهر )

أسم مدونتك؟

الشاعر الحزين

صورتك الرمزية في المدونة بتعبر عن أيه؟

ببساطه بتعبر عنى

هل فكرت في أغلاق المدونة؟ والسبب؟

للأسف مبقتش أقدر أقفلها لأنها بقيت من أهم أركان حياتى

أيه رد فعلك لو حد قل أدبه عليك في تعليق؟

هسكت قوى بس هتعب نفسيا قوى

أسوء مدونة؟

مدونة واحد مسيحى اسمها المسيح الهى للأسف بيسب فيها المسلمين

هيحصل أيه للإيميل بعد ما تموت؟

الايميلات مرتبطه بحياتى بمجرد ما تنتهى حياتى هتنتهى ايميلاتى

أديت الباسوورد لحد قبل كده؟

للأسف لسه مديتش الباسوورد لأى حد بس بفكر أديه لأغلى وأعز أصدقائى

السفر بالنسبة لك؟

للأسف أنا انسان بيتوتى يعنى أغلب وقتى بقضيه فى البيت
وغالبا على السطح بكتب خواطر أو فى البلكونه
لكن السفر يعنى عادى

المود بتاعك ايه؟

مقدرش أقول غير الحمد لله على

على فكره ده هروب من الإجابه

بتعمل أيه في وقت فراغك؟

يا بكتب خواطر يا قاعد على الاب توب

الأكلة المفضلة؟

هى مش أكله هو مشروب بجد بموت فى كوكتيل الموز والفراوله باللبن
بس بشرط يكون أنا اللى عامله
أنا ست بيت محترمه قوى قصدى راجل بيت بعرف أطبخ كل حاجه الحمد لله


الصفات التي أخذتها عن والدك؟

تقريبا كل حاجه الشكل والعند وهى دى أهم صفه العند
أنا عنيد جدا للأسف

الصفات التي أخذتها من والدتك؟

للأسف برده طيبة القلب الزايده
على فكره هم اللى بيقولوا كده مش أنا

اكثر ست حاجات بتحبهم؟

الله
محمد صلى الله عليه وسلم
أمى وأبى
أهلى
النادى الأهلى
للأسف الحــــــــــــــــــــــب

اكتر ست حاجات بتكرههم؟؟

الكذب
الكذب
الكذب
الكذب
الكذب
الخيانه
لأن لو الكذب اتوجد هيتوجد أى شئ قبيح فى الدنيا

شخصيتك نوعها أيه؟

عنيد قوى

لماذا دخلت عالم التدوين من الأساس؟

لقيت عالم التدوين ده عباره عن بيت صغير وأسره كبيره
وأحلى ما فيه ان كلنا بنحب بعضنا ومنكدبش على بعضنا

أحلى جملة قيلت في وصف مدونتك؟

أحلى جمله هى كل جمله اتكتبت عندى فى التعليقات

أهمية التعليقات بالنسبة لك؟

هى اللى بتدينى العزيمه انى أكتب تانى
وبتزرع فى قلبى سعاده كبيره قوى

احلى بوست كتبته؟ وضع اللينك ثم أذكر السبب؟

بصراحه أحلى بوست كتبته أنا لسه منزلتوش فى المدونه
وأعتقد انى مش هنزله لأسباب معينه

افضل مدونة قرأتها؟

كل مدونه كتبت فيها تعليق هى أحلى مدونه

أفضل بوست قرأته؟

كتير قوى قوى بس بجد أغلب المدونات اللى علقت عندها بتكون مواضيعها جميله قوى

الشغل بالنسبة لك؟

شغلى هو كرة القدم ولو سألتونى عن كرة القدم هقولكم حياتى

الأنترنت بالنسبة لك؟

العالم الأخر

تمرر التاج ده لمين؟

لالالالالالالا كفايه كده خلينى أنا أخر واحد يكتب التاج ده
عشان محبش انى أتعب الناس معايا كفايه الى هم فيه

===
=====
=========
=====
===


فى النهايه أكيد لازم أعتذر على اجاباتى الممله دى
بس والله أنا مكنتش حابب انى أجاوب على أى تاج
لكن مقدرش أرفض طلب أغلى أصحاب عندى
بعتذر بعتذر بعتذر

ومع السلامو عليكواااااااااااا

هناك 58 تعليقًا:

MǿиY El-Shreef يقول...

علاااااااء الديييييين

بموت ف الكارتون ده :p:p

ههههه والله ياعلاء مش ممله ولا حاجه

بالعكس تلقائيه واموره كده

احييك على اهلاويتك يابني

بسمش بحيك خالص ع ده

فى كوكتيل الموز والفراوله باللبن

موز وفراوله باللبن

اللهم احفظنا :D

كل تاج وانت طيب

موجة يقول...

علاء
اشكرك على ردك على طلبى بالايجاب
واحب اقولك
ان فعلا اكتر اسم لايق عليك
هو اسم الحزين
لانك حتى وانت بتجاوب ع التاج
حسيت بالحزن
ربنا يفرحك يارب

ঔღঔ نـــوارة ঔღঔ يقول...

ليييه يابني كدا

البنات عرفوا انك ست بيت اقصد راجل بيت وبتعرف تطبخ يا وقعتك هتلاقي البنات طوابير عليك يالا ياعم مين قدك

اتاريك عرريس لقطة هجووم يا بنات هههههههههههههههه

ال اجاباته مملة ال

اجاباتك صريحة اووي وطالعة من القلب

تستاهل التاج وبجدارة عشان تعرف اني مكنتش بدبسك كنت بهديك اجمل تاج وعاوزاك تبقى امير بس انت فقري اعملك اييييه ^ـ^

ههههههههههههه

ربنا يسعد ايامك ويبعد عنك الاحزان

(Joudy) يقول...

ياعينى هو التاج كان صعب للدرجة دى انت صعبت عليا دى أسئلة مباشرة طيب لو كانت الأسئلة من بين السطور ولا حتى من خارج المقرر كنت عملت ايه أنا عارفة أكيد كنت جاوبتها ههههههههه عارفة الروح دى أصلى كنت منهم لحد ما بقيت أقرأ كل حاجة فى المقرر حتى اسم مكتبة النشر تحسبا لأى ضربة تيجى على خوانه..... بس المهم عديت يابطل كل امتحان أقصد كل تاج وانت بخير...

الشاعر الحزين يقول...

مونى مونى مونى

صباح الفل يا قمر

لازم أحببك فى الكوكتيل

ومتنسيش انى قولت انى لازم اكون أنا اللى عامله عشان بيكون من ايدى حاجه تانيه
لكن لو حد تانى عمله مش بيكون حلو

وبعدين مسيرك تدوقيه بس لما ترجعى بس من السعوديه المتحده الشقيقه

زيارتك دايما بتسعدنى يا قمر

Lady E يقول...

مين اللي قال ان اجاباتك مملة يا علاء الدين

كل مدونه كتبت فيها تعليق هى أحلى مدونه

شكرا ليك بجد ان ده رأيك في مدونتي بما انك علقت فيها يعني :)

بجد اجابات مميزة

الشاعر الحزين يقول...

موجه

أنا تحت أمرك يا جميل

وبعدين بالنسبه للحزن هيسيبنى ويروح لمين بس ؟

أغلى تحياتى لكى

الشاعر الحزين يقول...

نوااااااااااااااااااره الفنانه

هههههههههههههههههههه

خلاص يا ستى أول بنت ليكى احجزيهالى
وأنا هريحها على الاخر من شغل البيت

قولتى ايه ؟؟؟؟

وبعدين أنا بقيت أمير من يوم ما دخلتى أنتى مدونتى ونورتيها

بجد بجد بجد نورتينى يا قمر والله

الشاعر الحزين يقول...

(Joudy)

الحمد لله انها جت من المنهج والا كنت سقت فى الامتحان وبعدين على فكره
أنا كنت مزاكر كويس
عشان أنتى متجيش بعد كده وتضحكى عليا
هاهاها

شوفتى بقى أنا أشطر منك ازاى ؟؟

نورتينى والله يا قمر
ودايما منورانى بزيارتك الجميله

الشاعر الحزين يقول...

Lady E

ايه بس النور ده ؟

ده كتير عليا والله
وبعدين أقولك على حاجه

ارجعى مدونتك واقرأى فيها بالراحه وبهدوووووووء خاص

هتلاقى أن أنتى بجد كلماتك من أحلى الكلمات ومدونتك من أحلى المدونات

وخالص تحياتى لكى

Lady E يقول...

الشاعر الحزين : مش للدرجة دي يا شاعر :)

عن نفسي ساعات مش بشوف مدونتي حلوة خاااااالص

الحقيقة هي مش حلوة الا بتعليقاتكم فيها

عاشقه الرومانسيه يقول...

علاء الدين
الشاعر الحزين
اجاباتك فيها تلقائيه وجميله مين قال انها ممله


سوء مدونة؟
مدونة واحد مسيحى اسمها المسيح الهى للأسف بيسب فيها المسلمين
***************
أسم مدونته المسيح الهى؟
اللهى يجيله ويحط عليه البعيد

الشاعر الحزين يقول...

Lady E

اسمعى أنتى كلامى بس واقعدى مع مدونتك لوحدكوا كده وفى الضلمه وفى هدوء وأنتى تعرفى انى عندى حق

وعلى فكره أنا متشكر جدا جدا لمتابعتك

بس برده اسمعى كلامى وأنتى تكسبى

تحياااتى

الشاعر الحزين يقول...

ههههههههههههه

عندك حق والله

حلوه قوى يجيله ويحط عليه دى
جميله والله

عثل يا خواتى عثل والله عثل

ساره يقول...

علاء الدين العزيز

من اجاباتك اقدر اقراء افكارك
ومنهم اقدر اعرف كل اسرارك :)

الله يعطيك العافه ويتتم عليك حسن الاخلاق ... لانك بجد قلبك جميل

وبعدين تعرف تطبخ وتعمل كوكتيل وحركات :) .. الله يرزقك بنت الحلال اللي تقدر الكوكتيل .. اقصد تقدرك :)

yoyo يقول...

ليه بتعتذر بالعكس اجابتك فيها تلقائية و عبرت بشكل كبير عنك

كمان عرفتنى انك اهلاوى طبعا لازم تكون اهلاوى دا حتى اللى بيجرى فى عروقنا لونه احمر هههههههه

كمان مشاء الله بتعرف تدخل المطبخ و تعمل اللى انته بتحبه يا سلام فى احلى من كدا يا بختها بيك بقى هههههههههه


كل تاج وانت بالف خير
تحياتى
يويو

الأمير يقول...

بصراحه اجابات جميله

وانت عنيد .. هنعديها
حزين للاسق .. ممكن " اسعدك الله اخى "

لكن
بتكره الحب ...!!!
لالالا ... لا اوافقك .

بجد ربنا يكرمك اخى ..
ويوفقك الى ما يحب ويرضى

تحياتى لك اخى ..
وتقبل تعليقى وزيارتى لمدونتك
التى تُعبر عن اشيااااااء كثيره
بداخلى ... احترامى . والسلام عليكم ..؛؛

fnoonh يقول...

قبل كل حاجة طبعا احب اقولك لازم نجيبلي الفانوس السحري مش انت علاء الدين اوك اتفقنا

عشان في كم حاجة كده كنت عاوزاهم دا طبعا غير الموبايل الهتجبهولي يعني انت متورط على الاخر ههههههههههههههههههههههههههه

تانيا
نعلق بقى على الاجابات احم احم واحد اتنين تلاته نبدا

انت بجد في كلية دراسات اسلامية ؟؟مشاء الله تبارك الله بابا متخرج منها ونفسه ادخلها بس مش عارفه ان كان ينفع ولا لاه؟؟ ولا لازم اكون متخرجة من مدرسة ازهر؟؟

وبيقولوا ان الكويس فيها ان مافيهاش اختلاط دا حقيقي ولا اشاعات؟؟
----

ومن ضمن الحجات البتحبها ليه قلت قبل كلمة الحب للاسف
الحب مش وحش حد قال انه وحش بس طبعا تقدر تحب كل شئ من غير معصية ربنا
اما لو تقصد على الحب اللي هوه من نوع تاني فهوه ده اليتحط قبله كلمة للاسف اما لو الحب الطاهر الصادق المايغضبش ربنا يبقى مفروض ماكنتش تحط كلمة للاسف


---------------
شكلي رغيت كتير مش كده ههههههههه
يلا مرسي على مرورك عندي

ايه ده ايه ده
دا انا البزورك لا لا
مرسي على مروري
لا لا برود غلط انت المفروض تقولها

اوك اوك افتكرت كنت عاوزة اقولك
تقبل خالص تحياتي وتقديري

الشاعر الحزين يقول...

ساره

أفهم من كده انك خلاص عرفتى كل أسرارى؟

على العموم بسيطه ما أنتى ورتطينى فى التاج ده أعملك ايه بقى ؟

اااه أنا كده فهمت يبقى أنتى كنتى بتورطينى عشان تعرفى كل حاجه عنى ااه يا لئيمه أنا كده فهمتك

هههههههههههههههههه

وبعدين متقلقيش هبقى أعملك واحد كوكتيل وأبعتهولك فى رساله أو فى تعليق ولا يهمك يا ستى

دايما دايما منورانى والله يا غاليه
خالص شكرى على مرورك الكريم

الشاعر الحزين يقول...

yoyo

هكلمك بصوت عالى عشان الناس كلها تسمع لأن الموضوع ده مفيهوش احراج

لو لم أكن أهلاويا لوددت أن أكون أهلاويا

وبعدين اللى ملوش أهل بيقول يا أهلى
ولا ايه ؟؟؟؟؟؟؟؟

الأهلى اتشرف بيكى يا قمر

خلاص نوطى صوتنا بقى

بالنسبه للأكل متقلقيش هبقى أعملك صنية مكرونه بالبشاميل وأبعتهالك فى رساله
ولا أقولك هبعتهالك فى تعليق أحسن

وشكرا قوى على أهلاويتك وزيارتك الغاليه ليا

الشاعر الحزين يقول...

الأمير

الأخ الغالى

ربنا يكرمك يارب
بس أنا مقولتش انى بكره الحب
أنا بقول للأسف بحب الحب

بشكرك جدا جدا جدا على مرورك الغالى جدا عندى

الشاعر الحزين يقول...

أفنان __ فنونه

يا قمر من غير فانوس ولا حاجه أنتى بس تأمرى والعفاريت تنفذ لوحدها

بالنسبه للكليه شئ طبيعى جدا ان كل كليات الأزهر غير مختلطه الرجاله ليهم كليه لوحدهم والبنات ليهم كليه لوحدهم حتى بيكون كلية البنات فى بلد غير كلية الأولاد احترام بقى هههههههه

وبعدين لو عايزه تدخليها ممكن تقدمى عليها بشهادة الثانويه بتاعتك بس مقدرش أضمن لك انهم يقبلوكى لأنهم غالبا هيشترطوا انها تكون من الأزهر


برده للأسف بحب الحب ومسيرك هتعرفى أنا ليه بقول كده بس مش دلوقتى لما تكبرى شويه ههههههههههههه

وبعدين يا ستى ارغى زى ما أنتى عايزه هنا الباب مفتوح للرغى
وبعدين لو كل الرغى زى رغيك كده يبقى أهلا أهلا بالرغى

ومن عنيا ياستى هقولك
ميرسى ميرسى ميرسى على زيارتك الجميله قوى دى

fnoonh يقول...

والله كويس الاحترام ده
اهه احسن من الاختلاط الفظيع والبنشوفه حاجة الصراحة مش كويسة ابدا

يلا ربنا ييسر ونشوف كده اصلهم عشان هنا بيدرسونا 3 مواد دين في الثانوية فقه وتوحيد وحديث
فناس كتير بتنصحني اروح كليه اسلامية بيقولوا هتكون سهله عليا

بس في سؤال

كام مطلوب منكم تحفظوا اجزاء من القران خلال فترة الكلية؟؟

طـــائر الليــــل الحـــــزين يقول...

اجاباتك مش مملة
وبجد بدل على شخصية هادية بتميل للوحدة احيانا
بتحب الحب واللى قولته عليه للأسف
انا معاك عشان للأسف كلنا بنحب الحب
لكن الواضح انه مش عايز يحبنا
والدليل على كده
ادخل على اى مدونة بتكتب عنه
هتلقيها بتصرخ من جرح علم ومش قادر يخف
وبرده عجبنى الحاجات اللى بتكرها وخصوصا انك علقت على الكدب وبعد كده الخيانة
واهم حاجة بقى انك اهلاوى وانا بموت فى النادى الاهلى
تحياااااااااتى

ماء تشرين يقول...

ومين القالك اجابتك ممله لا بالعكس والله دى ادتنا انطباع قد ايه انت شخص متزن رغم صغر سنك
عارف انا مبحبش التيجان عشان كده بتكشف الشخصيه اوووى وعشان كده مبحبهاش وفي ناس بعتتلى تيجان ومجوبتهاش وهعمل رابطة مدونين ضد التيجان
هههههههه
وبدعوك لانضمام ليها


سلام

الشاعر الحزين يقول...

فنونه

الكليه يا قمر أربع سنوات طبعا زى ما أنتى عارفه
قسمى القرآن بقى عليهم يعنى كل سنه تحفظى ربع القرآن وعلى فكره فى سنه أولى هتمتحنى فى ربع القرآن بس لكن فى تانيه هتمتحنى فى نصف القرآن وثالثه ثلاث أرباع القرآن ورابعه فى القرآن كله

شدى حيلك يا بنتى والله أنتى صعبانه عليا

بشكرك قوى على متابعتك الجميله دى يا قمر

الشاعر الحزين يقول...

طـــائر الليــــل الحـــــزين

تصدقى ان كلامك ده خلانى أرجع لإجاباتى وأقيس من خلالها شخصيتى

بس بجد أنا نفسى مش قادر أحكم على شخصيتى

عنك حق قوى بالنسبه للكلام عن الحب

وطبعا كلامى وكلامك سليم قوى بالنسبه للكذب والخيانه

وأحلى ما فى الموضوع الأهلى

لو لم أكن أهلاويا لوددت أن أكون أهلاويا

واللى ملوش أهل بيقول يا أهلى

بشكرك جدا جدا على مرورك الجميل ده

الشاعر الحزين يقول...

ماء تشرين

أنا معااااااااااااااااااك

سجلى اسمى أول واحد من فضلك

يا ستى دا أنا فضلت أسبوع عشان أعرف أجاوب على التاج ده بجد صعب قوى

وبشكرك قوى على الكلام الجميل اللى قولتيه فى حقى

وبشكرك أكتر على الزياره الجميله دى

aidy يقول...

بجد اجاباتت جميلة ومش مملة بالعكس حلوة جدا

تحياتى ليك وحاول تبطل عند شوية :)

بس ليه الحزن الدنيا فيها مكان للفرح ليه تحرم نفسك منه

حاول تغير الصفة دى من الحزين للسعيد

تحياتى ليك

الشاعر الحزين يقول...

aidy

زيارتك دايما بتكون مميزه

بس موضوع تغيير الاسم صعبه شويه
لو عرفتينى كويس هتعرفى ان كلمة حزين قليله قوى قوى

لكى منى كل الشكر على الزياره الجميله والمميزه

مجرد نقطة يقول...

على العكس امتعتني اجاباتك

صريحه و تلقائيه

^.^

ايمان روحي يقول...

جد مش عارفه شو احكي
بس بتشكرك علي اجابتك علي التاج
والله لو كمنت عارفه انوا هيخنقك هيك مكنتش ادتهولك
اسفه بجد
بس بجد التاج خلاني اعرف شي عن حضرتك
يـــاه انت شي فريد بعام واسع وكبير مش دايم بنلاقي شي فريد
بس جد انت حزين كتير
مش عارفه شو احكي بس جد بتمنالك تكون سعيد والفرحه ماتفارقك
علي فكرة اجابتك مش ممله ابدا
وشي حلوا كتير انك تتهرب من سوال بدل متجاوب وتحكي شي مش منك ولافيك
بجد بهنيك علي شخصيتك المميزة
صح حزينه بس اكيد هيجي يوم وتدحك بس احكي يــــارب
بصراحه استغربت لم عرفت انك قسم اسلامي
مش عارفه ليش بس جد شي بفرح
ربي يفرحك ويجعل الخير في دربك
تحيـــــــأتي

نبض الحياة يقول...

اجابات جميلة جدا
وانا مش متأخرة بخاطرى لكن بسبب النت
وادعولى انه يرجع تانى عشان انا مفتقدة التواصل الطيب لجميع صحبة هذا العالم الجميل
واجمل الاجابات اننا طلعنا ازهر فباالاضافة الى اكتساب اخ من هذا العالم فأيضا اخ من نفس نوع الدراسة بس طبعا انا عربى زى ما انت عارف .
دمت اخى الفاضل بكل خير .

الشاعر الحزين يقول...

مجرد نقطه

أشكرك جدا على كلمتك الجميله

وأشكرك أكتر على زيارتك الغاليه

الشاعر الحزين يقول...

إيمان روحى

أنا بصراحه مش قادر أتكلم
تعليقك جعل فيا شعور بالخجل الشديد

بصراحه أنا مش قادر أشكرك الشكر اللى يليق بيكى على كل الكلام الجميل ده

بس بجد بجد ربنا يبارك فيكى يارب
ويكرمك

بجد بجد بجد عاجز عاجز عن الشكر

أسعدتنى جدا جدا جدا زيارتك المميزه جدا

الشاعر الحزين يقول...

نبض الحياه

على فكره النت ده مشكله
بس أنا الحمد لله عالجت نفسى منه
وجبت خط دى اس إل وبقيت أنا اللى بتحكم فى النت ووصلت لأصحابى وجيرانى
يعنى بخدم الناس أهو
ههههههههه
بقولك ايه ؟

أنتى تغيرى محل اقامتك وتيجى عندنا ونكون جيران
فى الحاله دى بس ممكن أفكر وأديكى وصلة نت من عندى
وأبقى خدمتك خدمه كبيره أهو ياستى
عشان بس متقوليش ان احنا حارمينك من حاجه

وبجد بجد بشكرك جدا جدا على زيارتك الغاليه فى ظل ظروف النت القاسيه دى
الله يكون فى عونك ويرجعلك النت بألف سلامه
خالص شكرى لكى

نظره عين يقول...

انا فرحانه اوى انى بكتب تعليقى عندك بجد كلامك فيه صراحه وصدق وواقعيه وكلام من القلب مش فيه اى كدب او لوع بجد انت جميل اوى ياعلاء ربنا يارب يزيدك جمال كده وحب الناس

مصعب صلاح يقول...

ممكن احلل شخصيتك
اصل أنا بحب الموضوع دا اوي
بس بدون زعل
-------
حضرتك شخصية عنيدة ، انطوائية ، بتحب الناس جدا
حساس جدا ، واقعي وعملي وواضح
مش بتحب اللف والدوران
يعني دي بعض النقاط الرئيسية
ولان حضرتك إجابتك فيها حرص وغموض
فكفاية كده
---------
بدون زعل أنا باذكر اللي ليك واللي عليك
أتمني زيارة لمدونتي ، أصل انا ادبست ف موضوع التاج برضه
تحياتي

الشاعر الحزين يقول...

نظرة عين


بالرغم من انى أكتر حاجه بجيد فيها هى الكتابه لكنى أول مره أحس انى فعلا عاجز عن كتابة كلمه شكر توفى حقك فى الكلام الجميل اللى قولتيه فى حقى

بجد مش عارف أتكلم تعليقك أصابنى بحاله من الحرج الشديد وفى نفس الوقت سعاده غامره

بجد أنا متشكر جدا جدا جدا

لكلامك الجميل ده ولزيارتك الغاليه لمدونتى

الشاعر الحزين يقول...

مصعب صلاح

ربنا ما يجيب زعل أبدا يارب

زعل ايه بس دا أنت اديتنى أكتر من حقى

ربنا يكرمك وكلامك ده تاج على راسى

وأنا زورت مدونتك وهى فعى جميله قوى

بشكرك جدا على الزياره الغاليه دى
وأتمنى انها تتكرر تانى

zainab يقول...

أخى علاء

بقولك مافيش شوية كوكتيل من اللى انت بتعمله موز بلبن و فراواله

تحياتى

مهندس / على درويش يقول...

ايه اتأخرت في الرد انا صح
بس هنعمل ايه زي ما انت قلت ياله حسن الختام


بس انا كان عندي أمتحانات والنت كان بيرخم شويه او شويتين

ما انت عارف النت هنا في مصر ميقطعش وسرعه ملهاش حل


هنقووول ايه بفي

وشكرا طبعا لجابتك على التاج

تحياتي

جوجو يقول...

السلام عليكم

ازيك ياعلاء

مبرووك على التاج

اجباتك جميلة جداا

تحياتى

الفراشة الصغيرة يقول...

ايووووووووووة عليك
بجد انت عسول يا علاء

دى اجابات ممله حرام عليك
بالعكس عجتنى قوى فى حاجات كتير
اولها ان شخصيه عقلانيه قوووى
اما بالنسبه للعند
فاعتقد ده بقى صفت هذا الجيل

اما النسبه للشكولاته
http://www.3roos.com/uploaded/44444/01188210603.jpg

فكل الشيكولاتات دى ليك
ولا تزعل نفسك

خلاص صافيه لبن

القلب الحزين يقول...

اخي الشاعر الحزين
سعدت بمعرفتي مدونتك الجميلة دي
بس عارف اجابتك جميلة اوي كتبتها
بصفاء نية وقلب وبجد انت انسان شفاف
من جواك وقلبك ابيض وسعيد موت انك
اهلاااااااااااااااااااااااااااااااااااااااااااااااااااااااااااااااوي
تقبل مروري اخي الكريم

ســـهــــر يقول...

اول مره اشوف راجل بيتوتى بيحب البيت كده دى حاجه هايله جدا

وليا طلب انا عاوز كوكتيل يا علاء
وش مكسوف خالص

الشاعر الحزين يقول...

زينب

أنا تحت أمرك يا جميل

أنتى بس تأمرى

كفايه نورك فى المدونه
ده يكفى انى أبعتلك شوب كوكتيل كبير

من صنع ايديا وحياة عنيا

منورانى يا قمر

الشاعر الحزين يقول...

مهندس على درويش

أهم حاجه إنك وصلت والحمد لله

وشد حيلك بقى فى الامتحانات

وبعدين أنت طبعا عارف وأنا عارف

ان مصر أحلى بلد فيها نت دايما موجود ومش بيفصل أبدا

لك منى خالص شكرى
وتقديرى

الشاعر الحزين يقول...

جوجو

ربنا يكرمك يارب

نورتى المدونه والله

وزيارتك دايما غاليه

أشكرك جدا على الزياره

الشاعر الحزين يقول...

الفراشه الصغيره

ماشى يا قمر

وكمان جلاكسى دا أنتى متوصيه بيا قوى

خلاص يا ستى حليب يا قشطه

بس حلوه قوى أيوووووه الاسكندرانى دى

ههههههههههه

اسكندرانى أصلى أصلى يعنى

صباحك عسل يا جميل

الشاعر الحزين يقول...

القلب الحزين

أنا أكتر سعاده والله بزيارتك الكريمه دى

وأتمنى انها تتكرر

وأشكرك جدا جدا على

تعليقك المميز وكلماتك الجميله فى حقى

الشاعر الحزين يقول...

سهر

ايه الناس اللى داخله على طمع دى بس ؟

كل الناس عايزه كوكتيل ؟

طيب وأنا أشرب ايه ؟؟؟؟؟؟؟

ههههههههههههه

من عنيا يا قمر

بس على فكره أنا اللى ليا طلب عندك

أنا عايز أجى أشتغل فى الكافيه بتاعك ممكن ؟؟

ساسو كافيه

صدقينى هجيبلك زباين كتير

بس أوعى تدخلى اللبن والفراوله والموز الكافيه لأنك مش هتلاقيهم هخلص عليهم علطول

صباحك زى العسل يا جميل

zainab يقول...

اخى علاء

شكرا يا سيدى على الترحيب ده

بس ليه يا علاء الصورة اللى انتى حاططها فى البروفايل دى ( قمة الحزن ) بشوفها بحس بحزن كبير قوووى

تمنياتى بالتوفيق

الشاعر الحزين يقول...

zainab

أنتى بتبصى فى صورتى بتحسى بحزن

وأنا ببص فى صورتك بحس بتفاؤل

يبقى متساويين

ولازم يكون الحزن موجود والتفاؤل كمان موجود

وأشكرك جدا جدا جدا على المتابعه دى

اللؤلؤة يقول...

الشاعر الحزين
السلام عليكم
أول مرة أزور مدونتك وإن شاء الله لن تكون الأخيرة
كل إنسان عنيد لابد أن يكون طيب القلب ولكن لى عتاب عندك وهو أنك ذكرت إسم المدونة المسيحية وهذا يعطيها شهرة لا تستحقها وذلك بفضل حب الفضول لدى أغلب البشر
دمت بكل الخير

الشاعر الحزين يقول...

الؤلؤه

عليكم السلام ورحمة الله وبركاته

عندك حق فعلا لكن أنا موضعتش اللينك بتاع المدونه وأعتقد ان الكثير من الكثير من الزوار مسلمين عاقلين
ولو حتى دخلوا المدونه سوف يحتقروا هذا الرجل

وأشكرك جدا جدا على الزياره الكريمه
وأتمنى فعلا أن تتكرر الزياره الكريمه

تحياتى لك

شباك موارب يقول...

تمام
استمتعت جدا بقراءه تاجك الشخصي
واستغربت جدا بين جمعك للكوره ومجال دراستك
متهيالي اللي في شريعه انا يمكن كنت واخده عنهم فكره اوفر شويه

سعيده بمعرفتك جدا
وسعيده اكتر بتواجدك عندي
واتمنى لي دائما ان اسعد بتعليقاتك


تقبل احترامي

منار فايد

NeNo يقول...

لا بصراحه يا علاء اجاباتك مش ممله خالص بالعكس صريح جدا وواضح

وخلى بالك بقى من البنات كله دلوقتى عينه عليك يا معلم لانك هتريح الكتير من شغل البيت

بجد يارب يفرحك لان الحزن مش حلو دايما ممكن يكون احيانا لكن ربنا يفرحك ويبقى الفرح هو اللى ليه الحد الاكبر فى قلبك

دومت بالتميز انت ودونتك يا علاء