الثلاثاء، 14 يوليو، 2009

تاج أحلامى الضائعه

أحلام ضائعه



بسم الله الرحمن الرحيم


كان نفسى أجاوب على التاج ده فى وقت تانى


وقت غير الوقت ده بالذات


يمكن كانت اجاباتى هتختلف كتير عن كده


لكن مع محبتش أتأخر أكتر من كده


وعشان كده أتمنى تعذرونى على اجاباتى


لأنى متأكد انها مش هتكون زى ما توقعتم


ولكنى متأكد كمان أنها هتكون صادقه قوى



ونبدأ بسم الله





*********************


س1 / أذكر خمس أحلام على الأقل ..تخص ماضيك


وتحلم فيها بتغيير أشياء

أول حلم ليا وأخر حلم ليا هو تطبيق الشريعه الاسلاميه فى مصر

وبس مش عايز أكتر من كده

س2 / أذكر خمس أحلام على الأقل ..تخص مستقبلك

مستقبلى أنا ؟؟؟؟؟؟؟

أعتقد انه ( ملوش ملامح ) بس بجد نفسى أوى أوى

( أمــــــــــــوت )

حاسس ان هو ده الشئ الوحيد اللى هلاقى فيه راحتى


س3/ أذكر شخصين على الأقل .متواجدين في حياتك حاليا


..كنت تود وجودهم قبل الآن بزمن ؟

أصدقائى الغاليين جدا جدا

( أحمد عمر – محمد الحنفى )

لو الناس عايزه تتعلم معنى الإخلاص فى الصداقه

يبقى يتعلموا فعلا من صداقتى بأغلى اتنين

يمكن هم دول أحلى حاجه فى حياتى


س4/ أذكر شخصين على الأقل غير متواجدين في حياتك حاليا


كنت تود وجودهم الآن أو في حياة أولادك مستقبلا .. ؟

قرأت اجابات كثيره جدا جدا قالت فى جواب هذا السؤال

الرسول صلى الله عليه وسلم

ولكنى أختلف

لأنى لا أحب أن يكون الرسول الكريم موجود فى هذا الزمن

الملئ بالمعاصى والذنوب وغيرها مما كان لا يحب الرسول الكريم

أن يراها

ولكنى كنت أود فعلا أن يكون بيننا الشيخ الجليل

محمد متولى الشعراوى

فقط لكى أتعلم منه أكثر


س5/ تحدث عن ستة أسرار قد لا يكتشفها من يقابلك للمرة الأولى ؟

لا أحب أن أتحدث عن نفسى

ولكن حياتى ليس بها أسرار

فإنى عندما أقابل أحدا جديدا أقابله بشخصيتى الحقيقيه بكل ما فيها


س6/ تهدي التاج دا لمييييييييين؟

لا تعليق


***********************


طبعا أكيد أنتوا حاسين أنا كان شكلى ايه


وأنا بكتب الإجابات دى


عشان كده بطلب منكم تعذرونى قوى


وتدعولى قوى قوى لأنى فعلا محتاجها قوى الدعوات دى


دمتم جميعا فى رعاية الله وأمانه


والسلام عليكم ورحمة الله وبركاته

هناك 28 تعليقًا:

عاشقه الرومانسيه يقول...

اول تعليق
لعاشقه الرومانسيه
لاول مره فى المدونه دى
حجزززززززز
هيييييييييييه
هيييييييييييييه

عاشقه الرومانسيه يقول...

اروح اقرا وارجع
فووووووووووووو
جاى فى السرييييييييييييييع

عاشقه الرومانسيه يقول...

التاج ده معدى على المونتاج
ومقصوص منه كتييييييييير
ماعلينا
ماانت اصلا بتجاوبه من غير نفس
ياسيدى ربنا يفك كربك بس مش لدرجه انك تتمنى الموت
كده الشيطان مسيطر عليك
طيب انت شايف انك عملت شئ كويس تقابل بيه ربنا
ومهما تكون عملت
احنا كلنا اهل ذنوب ومعاصى

لما تضيق بيك قوى ألجأ له
روح وخبط على بابه واشتكى له
وهو اكيد مش هيخزلك
ده بيرزق الكافر
ده اسمه الكريم
الرحيم
الغفور
جرب كده واقهر شيطانك


اللهم احينى ما دامت الحياة خير لى وتوفنى ما دام الموت خير لى

فراشة يقول...

طبعا اكيد واضح يا علاء الحالة اللى انت فيها
وبجد عذراك جدا لأنى بجد من كام يوم لسه كنت فى حال شبيهه بالحاله دى وكنت حاسه انى مدمرة بس الحاجه الوحيدة اللى لا يمكن افكر فيها وكمان لا يمكن اقبلها منك ابدا انك تتمنى الموت
انا عارفه ان كله حيقولك كده واكيد انت متوقع ان كل اللى حيعلقوا عندك اكيد حيتكلموا عن النقطة دى بالذات

علاء رغم ان معرفتنا لم تتعدى التعليقات فى المدونات لكن بجد بداخلى شعور دائما بأن شخصيتك مليئة بالحياة وبالحنان والحنية تحديدا
وهذا على النقيض تماما من تمنى الموت

دى اكيد بتكون لحظات يأس وده اكتر حاجه زعلتنى ان اليأس تمكن منك

عايزة اسألك حاجه تانيه ازاى بتقول نفسك وامنيتك الوحيدة تطبيق الشريعة الاسلاميه فى مصر وكمان نفسك ان الشيخ الشعرواى كان يبقى معانا تفتكر ساعتها ينفع تتمنى الموت وتفتكر اللى يحب تطبيق الشريعة يتمنى الموت

ليه ماتتعملش مع اليأس على انه شخص قدامك بيحاول يستفزك وانت اللى بتنتصر عليه او بتعاند فيه كل ما يفوز بنقطة تقوله ولا يهمنى انا معايا ربى مش حتقدر على عظمته
انا ربنا بس بيشوف مدى قوة تحملى وصبرى واكيد فى النهاية النصر للايمان

كلامى كتير بس انت عارف انك من الاصدقاء اللى بحترم كلمتهم جدا واللى بزعل جدا لما الاقيك فى الحالة دى

بص للمستقبل من منظور النصر
الرسول الكريم قال النصر للاسلام حتما
يبقى احنا نجهز نفسنا لليوم ده
ملناش دعوه بالدنيا اللى تعبانة وموديانة فى داهية
كلنا تعبانين والله ياعلاء

فى ناس عندها هموم لا تعد ولا تحصى
الحمد لله احنا افضل مهما كان عندنا من هموم
انا عارفه ان كل الكلام ده بيبقى صعب يدخل اذن اى شخص مجروح او تعبان
عشان كده انا بقولك لو مش عايز تسمع لأى شخص خليك مع ربنا وبس

انا عملت كده وقولتها بالصريح انى مش عايزة حد من البشر لانى مش حاخد ساعتها غير طبطبة ومواساة
لكن مافيش غيره يقدر ينجينى وينجييك

فكر فى كلامى ومش عايزة منك غير كلمة واحدة استغفر ربنا فقط
واترك نفسك للدعاء ومناجاة الله واصبر مهما طولت الايام وادعى بكل اللى نفسك فيه واوعى تقول ده مستحيل
خد بالاسباب المادية والمعنوية
التقوى والدعاء

صراحتك فى الاجابات بتأكدلى طيبتك وحنيتك وبإذن الله حتمر الازمة
عشان مضحكش عليك مش حتروق خالص لكن حتتعدل للافضل

طولت قوى عليك بس ده مش بمقدار حزنك
اللى اتمنى زواله قريب جدا

اللهم انى اعوذ بك من الهم والحزن والعجز والكسل

يارب يزيك همك وكربك وتعود لنا بأفضل حال
تحياتى للشاعر الرقيق وليس الحزين

ليس فقيرا من يحب يقول...

السلام عليكم

ليه بس كده يا شاعر

ايه كميه الحزن والاحباط

والالم النفسى دى كلها

لدرجه تمنى الموت

انا معاك ان كلنا ممكن يعدى علينا

اوقات صعبه ومحبطه

بس ربنا موجود وارحم علينا من رحمه

الام برضيعها (واذا سئلك عبادى عنى فانى قريب )

صدقنى خلى املك فى ربنا كبير وكل حاجه

هتبقى كويسه اوعى تستسلم لاحباطك

وحزنك وخلى شعارك

اجمل ايام حياتى هى التى لم اعشها بعد

ربنا يفرج كربك ويريح بالك انت وكل

المهمومين اللهم امين

تقبل تحياتى

فى حفظ الرحمن

ঔღঔ نـــوارة ঔღঔ يقول...

ليه كدا يابني ماكلنا عندنا هم بيكفينا ويكفي العالم باسره :)

وعادي يعني عايشين وراضيين ومنفضين للهموم:]

وبعيد الشر عنك مينفعش كدا ربنا يطول بعمرك مفيش انسان مش بيخاف من الموت حتى لو ضعفنا وقلنا ربنا يموتنا ونخلص بنكون من الداخل مرعوبين وعاوزين نعيش اكتر عشان نرضي ربنا وبنكون خايفين من الحساب

خليك قوووي ازمة وتعدي مهما كانت ^ـ*

بعدين بذمتك دا تاج الا مش مجاوب الي كلمتين ونصصصصص

مش عاوزة اطلع لئيمة وادبسك واطلب انك تعيد الاجابة بعد ما تروق :)

رووووق كدا وانتظر مني القنبلة القادمة وياخوفي تنفجر فيي :(

ربنا يفك كربك ويوفقك بحياتك

تحياتي

7annen يقول...

ايه دا نفسك تموت بعد الشر حرام تقول كدا

ولا تكرهوا شيئا عسى ان يكون خير لكم

قول
اللهم امتنى لو فى مماتى خير واحيينى لو فى حياتى خير

وبعدين ربنا يديك طوله العمر

مش اى مشكله او ازمه تخلى الانسان يتمنى الموت

ادعى ربنا هو هيقف جمبك

وليه الاحباط دا خليك قوى كدا

متقولش عندى هم كبير قول عندى رب كبير

حنين

شباك موارب يقول...

قول استغفر الله العظيم\
يالله قول تلات مرات
كلنا بنمر بحالات كتيره مشابهه
مش كلنا بيعرف يصبر
علاء مهما كانت حجم المشكله او الظروف
ماتخليهاش تنسيك ان ربنا موجود....
وان تكاثرت عليك الهموم
اللهم اليك اشكو ضعف قوتي وقله حيلتي وهواني على الناس...

fnoonh يقول...

علاء
حلم جميل وكلنا بنحلم بيه والله ان مصر يتطبق فيها الشريعة الاسلامية
بس في حاجة
اعتقد انك انسان عارف الدين كويس لدرجة انك نفسك يتطبق في المكان الانت فيه

طيب ليه التشاؤم انا حاسة انك في قمة التشاؤم والاحباط
لدرجة انك عاوز تموت
اعوذ بالله
ليه كده
هيا صحيح الحياة متعبة بس مش للدرجاتي
استغفر ربنا والجأ له وانت ترتاح في الدنيا والاخرة

كل الاقدر اعمله اني ادعيلك ربنا يعينك ويفك ضيقك ويقدرلك الخير في حياتك

تحياتي

MǿиY El-Shreef يقول...

في ايه ياعلاء

مالك ؟؟

حاسوباتيه يقول...

مش عارفه اقولك ايه غير ربنا معاك ويفك كربك يارب وصدقني لما تضيق قوي كده يبقى الفرج جاي قريب ربنا معاك وبطل تشاؤم او حتى ماتوصلش تشاؤمك انك تتمنى الموت لان ده مش كويس صدقني

حارة سد يقول...

اسمح لي أن اختلف تمام الاختلاف مع نبرة الحزن المسيطرة عليك..لا أدعي أنني قاهر لأحزاني وألامي..ولكن أصنح علني أستفيد قبل أن أفيد

دعك من نبرة الحزن تلك فأنت تخلق سجنا بيدك لا بيد غيرك...لا تكن السجان وكن محرر النفس من قيود وغياهيب حزنك

دمتبخير

الحارة سد

ساره يقول...

كفايه حزن يا علاء
صدقنى مافي شئ يسوا

حياه بلا عنوان يقول...

علاء انت انسان حساس جدا وجميل جدا بس مش كل واحد فينا يمر عليه وقت من الحزن نقول اننا نتمنا الموت لان كل انسان منا مهما ان كان لايمكن ان يتمنى الموت لانه حرام انك تتمنا حاجه ربنا مش كتبهالك فى الوقت ده انت قول الحمدلله على كل شىء مهما ان كان الانسان لو حزن او مر بمرحله تخليه يكون حزين يتمنا الموت لان كلنا هنموت بس منقولش اننا نتمناه لان ربناخلقنا نعمل حاجه مش نيئس ونقول نتمنا الموت انت قول يارب وربنا كبير ويقدر على كل شىء وقول الحمدلله تحياتى ليك

مصعب صلاح يقول...

السلام عليكم

عزيزي علاء

يتألم قلمي وقلبي لتألمك فأنا من كارهي الحزن واليأس والانهزامية والاحباط

لماذا نتمنى الموت ؟؟

هل خلقنا الله لكي نموت

أرجوك راجع نفسك واعلم اذ لم تكن تريد الدنيا

فهناك من يحتاجك ف الدنيا

تقبل نصيحة أخيك الصغير

نهر الحب يقول...

السلام عليكم ورحمة الله وبركاته
حمد الله على سلامتك
بجد اجاباتك جميلة وحلوة بس بلاش اليأس والحزن انت لسه صغير وقدامك الحياة واسعة ولسه حتشوف كتير.
تعرف ان أكتر أمنية فى حياتى زيك إنى أموت (اللهم إن كان الموت راحتا لى فأمتنى).
ربنا يعفو عنا وعنك يارب,بس ايه الدليل على انا لو متنا حنكون مرتاحين؟ينقصنا التقرب من الله أكثر حتى يرضى عناوهل من مزيد,وقتها نقول ان الموت راحة.

تحياتى

نهر الحب

(Joudy) يقول...

مش لوحدك على فكرة يا علاء من الواضح انها حالة وانتشرت بين الجميع بجد شئ متعب ربنا يفك كروبنا كله وتعود للشفاه ابتسامتها

دمت بكل الخير والسعادة

الحــ ــزين يقول...

sad

خالد فوده - Khaled fouda يقول...

ايه ياعم
ما تحاااول تغير النظره التشاؤميه دي للحياه الحياه في الاحمر والوردي برضو
دمت بكل سعاده يا علاء

المره الجايه عاوز شعر يخليني اضحك

مصعب صلاح يقول...

السلام عليكم

انت فين يا شاعر

طمنيني عليك

بقايا إنسانه .... يقول...

علاء

مالك

ايه اللى فيك يا صاحبى

معلش

كل حاجة بتهون وبتعدى صدقنى

كل حاجة بتتولد صغيرة وبتكبر

والحزن هو الوحيد اللى بيتولد

فى القلب كبير وبيصغر مع الأيام

معلش يا علاء

ولو سمحت بقى فوق كده وارجع لنا تانى

سامحنى على التأخير بس والله يا علاء

غصب عنى أنا حالتى أكتر منك

بس الحمد لله على كل حال

تقبل تحياتى

سهوره

ريمان يقول...

كل تاج وانت طيب

ربنا يسعد ايامك


بس مش ينفع تقول انك نفسك تموت


لان كده حرام

والرسول علمنا نقول اللهم احيينى ما كانت الحياه خير لى وتوفنى اذا كان الممات خير لى

يبقى مش ينفع نقول انا نفسى اموت

جوجو يقول...

السلام عليكم

ربنا معاك ان شاء الله

بس ليه الياْس ده

اسفة على التاْخير

تحياتى

حفيدة البنا يقول...

فغبفالبتبي

حفيدة البنا يقول...

السلام عليكم:
ليه الحزن ده كله؟؟
عموما فرج الله كربك وفك حزنك ورزقك ما تتمناه دائما وابدا
بس الاجابه للاسف حزنيتنى جدااا
احلام مستقبلك الموت!!!!!
طب ازاى وليه
لو كل شاب قال كده هيبقى حالنا ازاى
انا مش عرفه صراحه اقول ايه
بس ادعى ربنا ييسر لنا جميعا الحال
والله الناس كلها حزينه مش عرفه فيه ايه
ربنا يسترها ويرحمنا ويفك كل همومنا
اللهم آمين
السلام عليكم

شباك موارب يقول...

علاء مبسوطع عشانك
وتاكد ان انت اخونا برضو
وزعلانين عشانك
وحكايه الظلم من اقرب الناس حصلتلي من قريب وفي موضوع مهم جدا جدا جدا كانو هما سبب في فشله
انا مقدره شعورك
صعب جدا جدا
لما تحس وقلبك يشاورلك انك تكرههم وفي نفس الوقت مش قادر
روق كدا وربنا معاك دائما
اختك/منار

Pink Dreams يقول...

طبعا واضح جدا انك مخنوق وفى حاجه
مأثره عليك جامد

بس بردو فى حياه اى واحد مننا بيبقى
فى فتره صعبه قوى فى حياته وفعلا بيبقى خلاص عاوز يموت عشان يستريح وبيبقى مفكر انه بكدا هتتحل كل مشاكله

بجد حاول تخرج من الازمه اللى انت فيها وحاول تتقرب من ربنا قوى لان انا كمان مريت فى وقت من الاوقات بلحظه كنت عامله فيها زيك كدا

بس الحمد لله عدت بخير وكل ما بحس انى مخنوقه بصلى عشان افك خنقتى

يا ريت انت كمان تعمل كدا مع انه واضح طبعا انك شخص متدين

تحياتى ليك

وربنا يفك كربك

kimo يقول...

بس ليه الحزن ده
الحياه عايزه اللي
يعندها ويضحك
غظبن عنها
تحياتي